Metadata
Letter of grace of Janneke Sbollens (February 1519)
General State Archives, Brabant Chamber of Accounts, 636, f.312- f.314r° (scans 391-393)
Transcribed by Els Lenaerts
Dutch
f.312r
f.312v-f.313r
f.313v
[f.312r°] Remissie van sekeren mesuse by Jenneken
sbollens gecommitteert
Kaerle etc. doen cont allen luden nu ende namaels
wesende dat wy ontfangen hebben die oitmoedige
supplicatie van janneken sbollens huysvrauwe van
janne ysewys inhoudende hoe dat in Augusto
lestleden de voirs. suppliante getrouvt heeft ende
tot hueren man genomen den voirs. jan zonder
[f.312v°] hem te kennen te geven dat zy daertevoiren een
kint ontfangen ende gecregen hadde by eenen
jongen coopman Ende drie maenden of
daeromtrent naeden voirs. huwelick heeft de
selve suppliante die noch nyet voldregen en hadde
noch oyt tot eenigen aerbeyt van vrauwen geweest
haer gevoirdert te wasschen ende schueren Ende
naer dat zy alsoe gewasschen ende geschuert
hadde drouch een mande met cleeren op huere
zyde zoe dat met diere zy huer zoe zeere
vermoeyde dat zy op eenen nacht zieck geworden
es ende creech groite pyne nyet wetende wat
haer was Ende de pyne wat vergaen wesende
viel zy in slape Ende corts daernae creech groite
camerganck ende ginck tweemalen up een heymelicheyt
die gemeyne was met hueren gebueren Ende
de leste reyse crygende groiter pyne dranck
soe styf dat huer die ader brack ende met
dien ontschoot haer het kint ende viel inde
heymelicheyt seggende tot hueren voirs. man de
welcke boven quam daer hy de suppliante vant
Man my es daer wat ontgaen sonder dat zy
tkint al willens inde selve heymelicheyt heeft
laten vallen oft geworpen angesien dat zy kints
doucken ende andere gereetschap daertoe dienende
gemaect hadde . Ende tkint alsoe daer
wesende wert crytende soe dat de gebueren
dat gecryt hoirende deden eenen metser halen
die de pype vander heymelicheyt opbrack ende
met kerssen ende licht wert gesien ende gevisscht
Ende hoewel dat dit aldus geschiet es ende
[f.313] dat de voirs. suppliante daeraff groot berauw gehadt ende
noch heeft ende meynde noch tyts genouch te spreken
met eene vroevrouwe om haer te helpen angesien dat
zy noch zekeren tyt te gaen hadde Nyetmin de selve
suppliante te bedde ende in kinder bedde liggende heeft
onse scoutet onser stadt van Antwerpen gesonden
zekere dienaers int huys daer zy gelach omme haer te
bewaren ende naeden kinderbedde jegens haer te
procederen Aldaer zy nochtans met subtylhede
is uuytgerocht ende haer gesalveert heeft opt
gewyde of vrye plaetsen Midts den welcken
beducht die suppliant datmen tegens haer noch zoude
willen criminelick procederen . Dwelcke haer haeren
man ende anderen vrienden commen ende keeren zoude tot
groiter scande oneere scade ende ongenouchte Ten zy
dat onse genade ende gracie haer hier op verleent
worde Omme de welcke angesien tgunt des voirs.
is ende oick dat tvoirs. kint nu oude is twaelf
weken of daeromtrent sonder zydert dier tyt enich
letsel of gebreck gehadt te hebben zoe zy seyt ende
omme welcke gracie zy ons oetmoedelick gebeden
heeft Soe eest dat wy de saken voirscreven
overgemerct willende der voirs. supliante in desen
gracie ende genade prefereren voir riguer van
justicie . Der selver supliante genegen wesende
tot huerder beden ende begeerten By deliberatie
van onse zeere lieve ende beminde vrouwe ende
moeye die Ertshertoginne van Oistryck hertoginne
ende gravinne van bourgoingne douagiere van
savoyen regente etc. ende vanden hoofde ende luden
van onsen privaten rade neffens haer wesende
ende oick in faveur van zekere goede ende notable
mannen die haer daervan hebben erustelick versocht
[f.313v°] ende gebeden. hebben inden gevalle als boven
quytgescholden vergeven ende geremitteert schelden
quyte vergeven ende remitteren uuyt onser
zunderlinger gracien by desen onsen brieve het
mesuz delict ende infractie van gevanckenisse
boven verclaert mitgaders al tgene dat zy ter
causen van dien met des daeraen cleeft tegens
ons ende justicien mesdaen ende verbuert mach
hebben Ende hebben huer daeraf wedergestelt
ende gerestitueert wederstellen ende restitueren tot
huere goede fame ende name tot onsen lande ende
hertochdom van brabant ende anderen onsen landen
ende heerlicheden ende tot hueren goeden onverbuert
zynde indien zy eenige heeft gelyck zy was
voerde toecompste vanden stucken ende mesvalle
voirscreven imponerende hierop onsen procureur
generael ende allen anderen onsen justicieren ende
officieren onss voirs. lants van brabant een
eeuwich geswych ende silencie Behoudelick
nochtans dat de voirs. suppliante gehouden sal zyn
op te leggen ende betalen die redelicken costen
van justicie daeromme gedaen ende naegevolcht
Ter taxatien ende arbitragien van onsen lieven ende
getrouwen die Cancellier ende luden van onsen
rade geordineert in brabant die wy daertoe
committeren Ontbieden daeromme ende bevelen
den selven onsen Cancellier ende luden van onsen
voirs. Rade dat voir henlieden geroupen de gene
die daertoe behoiren geroupen te zyne zy
procederen wel ende duechdelick ter verificatie
ende interinemente van desen ende tot taxatien
vanden voirs. costen Ende dat gedaen zy onse
[f.314] voirs. scoutet van Antwerpen ende marcgreve
ons lants van ryen Ende alle andere onse ende der
smaelre heeren richteren justicieren ende officieren
onss voirs. lants van brabant dien dit aengaen sal
mogen huere stedehouderen ende een yegelick van hen
soe hem toebehoiren sal doen laten ende gedoigen
de voirs. supliante van deser onser gracien quytscheldinge
remissie ende pardoene inder manieren boven verclaert
rustlick vredelick ende eeuwelick genyeten ende gebruycken
sonder haer te doene noch te laten geschyene
In lyve noch In In goede eenich hinder letsel of
moeyenisse ter contrarien Maer indien haer lyf
oft enige van hueren onverbuerden goeden waren
daeromme gevangen becommert of gearresteert dat
zy die stellen of doen stellen terstont ende sonder
vertreck tot volcommen delivrantie want ons alsoe belieft
Ende ten eynde dat dit vast ende gestadich zy tot
eeuwigen dagen soe hebben wy onsen zegel hieraen
doen hangen Behoudelick onsen rechten in anderen
dingen ende anderen huer recht in allen Gegeven
in onser stede van Antwerpen inde maent van
februario int jaer ons heeren duysent vyfhondert
ende negenthien Ende van onss rycken Te
weten vanden roemschen dierste Ende van
castille etc. Tvierde Aldus stondt Gescreven onder opte plycke
Byden Coninck in zynen Rade
Ende geteekent h de hane Ende noch visa
Gecollationeert ende bevonden
concorderende metten originale
By my
Stratis
N/A