Metadata
Letter of grace of Jacob de Cock (january 1530)
General State Archives, Brabant Chamber of Accounts, 639, f.42-43
Transcribed by online volunteer collective
Dutch
42r
42v
43r
[f.42v]
Kaerle etc. doen te wetene allen iegenwoirdigen ende toecomen[de]
dat wij ontfanghen hebben die oetmoedige supplicacie van Jacop
de cock scamel jonckman scipper belast met eender jonger huijsvr[ouwe]
en[de] kinderen woenachtich te keldrecht in onsen lande van vlaende[re]n
inhouden[de] hoe dat omtrent onderhalff jaer geleden de voirs. suppl[ian]t
met Cornelis lootsene go[m]maer de keersmake[re] al[ia]s wils ende meer
ande[re] geweest is ten huyse van Jan Roelandts tavernier inde prochie
van Hemi$$$ in onsen lande van brabant Es gebuert dat alzoe zij
aldair hebben aende taefele geseten dat daer van buijten innegecomen
es een van huerlieder geselscap geheeten hennen casins seggende
gesellen hoe maecte ghijt aldus es de gans al oppe daer op dat
antwoirde de voirs. gommaer Iaes al waerder noch meer want
deen steket in zijn tessche en[de] dander in zijn mouwe waerop dat
doen de voirn. cornelis zeyde wat leegt u daer aene en[de] smeet den
voirn. go[m]maer wils voer zijn aensicht met zijn vuyst seggende
houdt dat daer voren ende met dien geruchte zoe quam alzoe de
suppl[ian]t inde came[re] vragen[de] wat schuylt hier daer op doen antwoirde
de voirs. Cornelis lootsene maet oft geselle zij seggen dat wijt al
nemen oft in onse tassche ende mouwen steken daer op de voirs.
suppl[ian]t anwoirde wije seijt dat daer op cornelis zeijde gommaer
wils en[de] met dien nam de suppl[ian]t een hantbusse ende sloech daermede
den voirs. go[m]maer op zijn schouwere ende voirt nemen[de] zijn dagge
pijnde hem te stekene daermede naer den voirn. gom[m]aere maer en
geraecte hem nyet en[de] alzoe schiet tvoirs. geselscap zonder ijet
meer elck ande[re]n te quetsen oft grieven Ende des anderen daechs
alzoe Jacop mijns vraechde tot den voirs. gom[m]aer hoe hebdij ghy u
nu antwoirde de selve go[m]maer daerop het es al wel ick peijse
dat mij onthouden es in mijnen iongen tijt Ende heeft de voirs.
gom[m]aer gewracht gedroncken ende besich geweest drie oft vier
daegen naede quetsure zonder datmen aen hem eenich gebreck
sach vand[en] voirs. slage Ende dat meer es alzoe hem de prochiaen
van hoboken die hem biechte ende het weerde heylich sacrame[n]t
gaff hem tevoren vraechde buyten biechten aengaen[de] den voirs. twiste
zeyde daer op de selve gom[m]maer hee[re] oft yemant mochte suspicieren
oft vermoeden dat dese siecte daer ick aen ligge soude zijn geco[m]men oft
[f.42r] uuytsponck oirspronck genomen hebben uuijt saken van sonmigen slagen
die ick ontfangen hebbe van so[m]migen scippers zoe gheve ick te
kennen dat ick dese ziecte lange inden lyve gedragen hebben Ende
zoe verre ick quame van levenden lijve ter doot zoe ontdrage ick de
sleve scippers vander doot Ende is daer nae gestorven Ende
hoewel de suppl[ian]t p[ar]tie geinteresseerde gesoent en[de] gebetert heeft
En soude nochtans midts beduchten[de] rigeur van justicien hem nijet
dorren vinden hanteren noch converseren in onsen lande van brab[ant]
maer elders leven in groeter aermoeden en[de] miserien Ten waere
dat hem onse gracie hier op verleent ware Alzoe hij seeght O$$
daerom[m]e zeer oetmoedelijck biddende Besunde[re] dat ons believen
wille hem te doen expedieren onse oepen[en] brieven van remissien in
sulcken saken gewoenlijck. Waeromme zoe eest dat wij
die saken voirscr$$en overghemerct den voirs. Jacop de cock
suppl[ian]t genegen wesende tot zijnder beden en[de] supplicatien Ende
willen[de] hem in dit stuck gracie en[de] genade prefereren voer
strangheyt van justicien hebben inden gevalle als boven vergeven
quijtgescholden en[de] geremitteert vergeven schelden quijte ende
remitte[re]n uuijt sundelinger gracien bij desen onsen brieve tfeijt ende
dootslach boven verclairt metgaders alle peijne ende bruecke
corporelle en[de] criminele dair inne hij ter causen van dien met datter
aencleeft tegens ons ende justicie mesdaen ende mesbruyct mach
hebben Ende hebben hem als dair aff wedergestelt en[de] gerestitueert
stellen weder ende restitueren midts desen onsen voirs. brieve tot zijne
goede faeme en[de] name in onsen voirs. lande van brabant en[de] allen ande[re]n
onsen landen en[de] heerlicheyden ende tot zijnen onverbuerden goeden
indijen hijre eenige heeft gelijck en[de] in alder manie[re]n als hij was
voer de toecompste ende gesciedenisse vanden feijte en[de] dootslage
voirs. imponeren[de] hier op silen[cie] ende een e$wich zwijgen ons[en]
procureur g[e]n[er]al van brabant en[de] allen ande[re]n onsen iusticieren ende
officieren wie hij zij Satisfactie ende beternisse eerst ende voer
al gedaen der partie geinteresseerde indyen die noch nijet gedaen
en es en[de] eenige daer toe staet civilijck allenlijck Behoudel[ijc]
oijck dat de voirs. suppl[ian]t gehouden werd tvoirs. feijt tegens ons
te beteren civilijck naer de gelegentheijt vand[en] mesdaet ende
[f.43r]
en de faculteyt van zijnen goeden Ende oyck te refonderen ende
betaelen de redelycke costen van iusticien indyen datter eenige gedaen
oft naergevolght zijn Ter taxacien en[de] arbiterscepe van onsen lieven
en[de] getruwen Ridde[re] ende cancell[ie]r hee[re]n Jheronimo vand[er] noot ende
den luyden van onsen Raede in brabant die wij daer to$ co[m]mitte[re]n
Ontbieden dairom en[de] bevelen den selven van ons[en] raede in brabant
dat voer hemluyden geroepen die ghene die daer over behoiren
geroepen te zijne zij procede[re] wel en[de] duechdelijck ter verifficacie
en[de] interinemente van desen naer huer voirme ende inhouden Ende
dat gedaen ende die voirs. civile boete getaxeert gearbitreert en[de]
betaelt zynde in handen vand[en] ghenen van onsen ontfangers diet
behoe[re]n sal die welcke gehouden werdt reken[inge]n bewijs en[de] reliqua
te doene tot ons[en] behoeff metten ande[re]n penn[ingen] van zijn[en] ontfange zij en[de]
allen ande[re]n ons[en] justicieren en[de] officieren wyen dit aengaen sal mogen
huerl[ieden] sted$houde[re]n jegewoirdich en[de] toecomen[de] en[de] elck van hen besunde[re]
zoet behoe[re]n sal doen laeten en[de] gedoogen den voirn. suppl[iant] van dese
onse gracie remissie quijtsceldinge en[de] p[ar]doene zoe en[de] inder manie[re]n
als voeren rustel[ijck] ende vredelijck genyeten gebruijcken ende useren
sonder hem te doene oft te laeten geschien in lyve noch in goede
eenigen hinder letsel oft moyenisse ter contrarien maer indyen
zijn lijff daer oft eenige van zijn[en] onverbuerden goeden daero[m]me
gevangen gearreste[er]t oft beco[m]mert wae[re]n die stellen en[de] doen
stellen terstont en[de] sonder vertreck tot volco[m]men delivran[cie] want
ons alzoe gelieft En[de] ten eynde dat dit goet vast en[de] gestadich
blijve tot eeuwigen daegen zoe hebben wij onsen zegel hier aen
doen hangen Behoudel[ijck] in ande[re]n saeken ons recht en[de] eenen
iegel[ijck] tzijne in allen Gegeven in ons[en] stadt van bruessele inde
maent van januario int jaer onshee[re]n duysent vijffhondert
een en[de] dertich van onsen keijserijcke tweeste ende van onsen
rijcken van spaengnen beyde den cecillien ende ande[re]n txvie jaer?
Aldus stont opde plycke gescreven byden keyse[re] in zijn[en] raede
en[de] geteekent L. du blioul en[de] visa re[cep]ta
Ghecollatio[n]neert tegens
doriginaele brieven by mij
De cock
N/A
